Madagate.com le premier portail d'information et d'analyse politique de Madagascar

Nangina tsy niteny ny tenako raha nivoaka ny Alatsinainy 10 Novambra 2014 teo ny vokatra ofisialy izay nolazaina fa tsy azo ivalozana. Raha izay tokoa no nitranga dia tsy ho nisy mihitsy ny savorovoro. Noeritreretina tokoa fa mpanao gazety matotra no nikarakara sy nitantana iny fifidianana iny tamin’ny alàlan’ny fanendrena avy amin’ny ministeran’ny Serasera, ny Fampahalalam-baovao ary ny Fifandraisana amin’ny Andrim-panjakana. Tsy izay anefa no niseho, niarahantsika nahita izany.

Noho izany dia :

- Lavinay, izaho sy ireo mpanao gazety an-jatony maro nanohana, ny voka-pifidianana tamin’ny asabotsy 08 novambra 2014 lasa teo iny. Teo amin’ny toeran’ny Sekretera jeneraly dia elanelam-bato roa monja no nanasaraka ny mpifaninana voalaza fa voalohany sy ny tenako. Raha toa ka nisy tany ho any isam-bato folo voalaza fa hita tampoka teo amin’ny toerana ny Filoha dia azo lazaina avy hatrany fa misy vato folo hafa na maherin’izany nafenina ihany koa tany ho any izay nisafidy ny tenako.

- Takiana ny famerenana hatramin’ifotony ny fikarakarana ny fifidianana. Ny voalohany dia ny mikasika ny lisi-pifidianana izay fantatry ny manana saina mahiratra fa feno hosoka. Nampidirina tao anatin’izany lisitra izany na ny mpamafa trano na ny mpamily amin’ny orinasa sasany. Eo ihany koa ny fanapahana ireo faritra ahitàna ny biraom-pifidianana ("découpage électorale").

- Taorian’ny fametram-pialan’ny mpikambana efatra tao amin’ny komity mpikarakara dia takiana ny fametraham-pialan’ireo mpikambana ambiny. Tsy ilaina ary tsy ekena ny fitsabatsabahan’ny mpitondra fanjakana sasany amin’ny tontolon’ny asa fanaovan-gazety.

« Ny mpanao gazety, olo-mendrika »

Natao teto Antananarivo, ny faha-12 novambra 2014.