Na amin’ny fomba ahoana dia tsy maintsy taitra foana aloha raha vao mahare ny fahalasan’ny olona fanta-daza.
Androany Alatsinainy 21 Septambra 2020, tao amin’ny hopitaly HJRA Anosy ary, dia nandao ity tany fandalovana ity i Rahamafadrahona, mpanoratra mpamoron-kira mpihira («auteur compositeur interprète») tsy misy izay tsy mahalala.
Alphonse Rakotomahafadrahona sy Mariette Rasoarinala, nitondra ny anarana Bakomanga, nodimandry ny 2 Jolay 2020
Alphonse Rakotomahafadrahona no tena anarany ary i Ramafa koa no fiantsoina azy. Teraka ny 09 Aogositra 1938 izy. Izany hoe 82 taona izy nandao antsika io. Ny taona 1960 izy no nanomboka niditra teo amin’ny sehatry ny kanto. Hafa mihitsy ny fomba fanetsehany ny lohany… Be hatsikana izay koa izy. «Bakomanga», «Mama», «Raozy Maria», «Ity semboko ity», «Vive l’amour»... Santionan’ny hira nampalaza azy ireo. Fa maro ireo noforoniny ka.
Nanolotra fandaharana ihany koa izy tao amin’ny RNM (Radio nasionaly). Ary izao foana no nanombohan’i Ramafa izany fandaharana izany :
«Dia manolotra ny arahaba soa arahaba tsara ho anareo mpihainon’ny Radio Madagasikara». Io Radio Madagasikara io no anisany nandaniany ny fahatanorany ary mbola hatramin’izy nandao antsika izao. Nankafiziny mihitsy ny manolotra hira gasy ho an’ny mpihaino. Ary dia nanentana ny fandaharana mitondra ny lohateny « Hira gasy » isaky ny Alahady tolakandro ihany koa izy ao amin’ity radiom-pirenena ity. Tsy vitan’izay fa mbola mpilalao tantara an’onjampeo tao ihany koa i Ramafa.
Ary na dia nisotro ronono efa ela izy, dia mbola nanatontosa hatrany io fandaharana mivohy ny kolontsaina tena malagasy io. Izao ny teny filamatr’ilay fandaharana : « Malagasy ve ianao? Malagasy ray sy reny, ary tena Malagasy ara-pomba sy fiteny? ». Io no nentiny nitety firenena maro nandratany hatrany ny kolontsaina malagasy. Izao no fandresen-dahatra nolazainy foana : « Tsy misy ratsy ny mozika fahiny sy ny ankehitriny, fa samy manana ny fanehoana ny kanto fotsiny ».
Mba fantatrareo koa ve fa mpilalao horonantsary koa i Ramafa ? Tsia ? Dia tadiavo ary ilay horonantsary mitondra ny lohateny hoe « Dadabe môderina », izay sady nosoratany no lalaoviny. Mpanoratra tantara, tononkalo ihany koa izy, ary matetika dia ampidiriny ao amin’ny fandaharana tontosainy izany asa sorany izany.
Tsy azo adino koa fa mpandihy i Ramafa ary mpandrindra ny dihy ataon’ny tarika « Ramahafadrahona ».
Hainy ary talenta mampiavaka azy ilay manodina loha iny na any anaty hira na eny an-tsehatra. « Tamin’izaho tany Inde no nianarako iny fihetsika iny », hoy i nanazava, indray mandeha izay.
Be ny azo lazaina mikasika an’i Ramafa izay tena mpanakanto feno tanteraka. Ary tsy adino fa niditra teo amin'ny sehatry ny politika ihany koa izy tamin'ny alalan'ny FVMM, ka kandida ho solombavambahoaka izy ny taona 2013. Fa izao aloha dia maneho ny fiaraha-miory amin’ny fianakaviana aho, amin’ny anaran’ny tenako sy ireo mpanao gazety mpiara-miasa rehetra amiko. Ho lazaina amin’ny manaraka ny momban’ny fanaovam-beloma farany an’i Ramafa.
Jeannot Ramambazafy
Tsy nisy fanaovam-beloma ho an'i Ramafa
Izay tokoa angaha no lahatra ? Ny alin'ny andro nahalasany ihany i Ramafa no nalevina anirotra ao Itaosy Vinany... Tsy hitako izay ambara fa io misy vidéo fahatsiarovana io fotoana sarotra sy mampahonena io... Isaora mitafotafo i Rossy. Fa mandrapahafindrana ny razany dia tsy handry am-piadà nana mihitsy aloha i Ramafa e!
