RAHA HIJERY VIDEO TSINDRIO ETO
Ny Alatsinainy 07 septambra 2020, tamin’ny 8 ora maraina dia nigadona tao amin’ny Lapan’ny Praiminisitra ao Mahazoarivo ny Praiminisitra Christian Ntsay izay marihina fa tsy re sy tsy tazana firy tamin’iny herinandro lasa iny. Inona marina ny antony ? Aleo izy tenany ihany no hilaza izany.
« (…) Be dia be moa ilay resaka hoe : aiza ny Praiministra, maninona izy… Izaho aho izao. Dia ny zava-dehibe fotsiny dia izao : ny olombelona rehetra dia nofo aman-drà ary ao anatin’izany dia tsy maintsy misy foana ny fanaovana fitsirihina ara-pahasalamana izay tsy maintsy atao.
Izay no zava-nisy, ary tsy tokony handeha ankoatra ny lafiny ohatran’izany. Misy miteny hatramin’ny hoe voan’ny AVC ny Praiministra ; voan’ny « empoisonnement » ny Praiminisitra sns, sns… Izany no atsapanareo tokoa fa raha hino ny zavatra rehetra ao anatin’ny Facebook ianareo dia ho very, ho very mihitsy. Ary efa voalazako ombieny ombieny fa malalaka ny eto amintsika, miaina ao anatin’ny Demokrasia ny firenentsika.
Be dia be ny firenena amintsika miteny izao no tsy manaiky ny fisian’ny zavatra ohatran’izany. Ary miditra any am-ponja mihitsy, ary tapahina mihitsy ny Facebook amin’ny firenena maro, izay averiko fa firenena mandala ny Demokrasia, ary tsy kianina mihitsy, eran-tany.
Isika dia miaina ao anatin’ny Demokrasia. Izany Demokrasia izany mila Fanabeazana, mila fahatongavan-tsaina izany ho an’ny tomponandraikitra dia ho antsika Malagasy rehetra. Tsy izay zavatra resahina dia ho marina daholo.
Ary izay no isaorako anareo be dia be tamin’izay fahatoniana hatrany nasehonareo mpiara-miasa eto anivon’ny fiadidian’ny Praiminisitra, ny amin’izay tsy fihainoana fahatany ny zavatra misy fa mipetraka ao anatin’ny fahatoniana foana, mandinika ary mijery, mamakafaka (…)./.
Nandray an-tsoratra : Jeannot Ramambazafy
Sary : Harilala Randrianarison sy Andry Rakotonirainy
******************************
